مسلسل طريق
من الواضح إنو شو ما لبست نادين نجيم بتطلع حلوة. في ناس هيك، كل شي بيلبقلها. الملابس الغالية و الفخمة بتطلع حلوة عليها و البساطة بتطلع رائعة. المكياج البسيط جداً مناسب للشخصية اللي عم تلعبها، يعني باختصار نادين ما فيها ولا غلطة. بالنسبة لباقي الملابس، كتير مناسبين للشخصيات متل تياب شادية مثلاً (ختام اللحام) اللي مطابقين للوضع الاجتماعي اللي عايشين فيه.
أما إذا بدنا نحكي عن كوارث الموضة فلازم نتوجه لعند رغدة خطيبة جابر، إنو بعرف مقصودة و كل شي بس و لو، شو هيدا؟؟ من وين جايبة هالجينز اللي ما في محل مش مخزوق و إنتي رايحة على عزا!! إنو سيريوسلي؟؟ و بعدين بليز حاج تلبسي فرو.
بس فعلاً تياب جابر رهيبين، يعني عنجد بدها إبداع و فن ليقدروا يظبطوا هيك تياب مع بعض
مسلسل الهيبة – العودة
يعني فينا نقول إنو هالمسلسل من بعد نادين ما بقا في ستايل بالتياب و بحس إنو هيدا شي طبيعي، لأنو هي اللي كانت جديدة عالهيبة و طبيعي إنو يكون لبسها مميز عن الباقي. أما بهذا الجزء، بحس الستايل تابع للجو العام للمسلسل و المقصود إنه ما يكون لافت للنظر، مع إنو ما فينا ننسى فستان عرس مريم (فاليري أبو شقرا) اللي كان كتير ناعم و لابقلها
مسلسل لعنة كارما
بس حدا يفهمني من وين هيفا بتجيب تيابها. يعني لو اخرعت آلة زمن و رجعت فيها ١٥ سنة لورا مستحيل تلاقي ستايل قديم و بايخ هلقد. هيفا كانت أيقونة الموضة بس ما بعرف إذا مقصود بمسلسل لعنة كارما إنو تبين هيك. كل شي كتير أوفر و ألوان و حركات و موديلات لا تمت للموضة أو الأناقة بصلة، سوري يعني بس راحت عليكي يا هيفا أو ممكن نرجع نشوف أناقة و ستايل هيفا اللي تعودنا عليه برا المسلسل. و ملاحظة: في مجال تبطلي تمدّي بوزك عالطالعة و النازلة، رح تعضلي
مسلسل اختفاء
النجمة نيللي كريم ناعمة و بسيطة و مظهرهاغير ملفت للنظر في دور الدكتورة فريدة، أما في دور نسيمة فإن اختيار ملابس الستينات و السبعينات رائع، الفساتين و ألوانها، تسريحات الشعر، و المكياج غاية في الأناقة. ما ممكن اختار فستان مفضل هلق، بفضل شوف أكتر بس بصراحة الشعر الأشقر مبين حلو عليها و هي حلوة و قريبة من القلب
